Ulwaphulo-mthetho

ZINQAKULWE IZIBHOVU-BHOVU ZAMATUTU NABABULALI NGEZITYHOLO ZOBUBHILI-BHILI NOBUKILINGWANE

DIKENI- Zizigila-mkhuba ezilishumi elinesihlanu(15) ezibanjiweyo ezinxulumene nokubulala kunye nokuzama ukubulala kwiDyunivesithi yaseFort Hare.

Othethela inkonzo yesipolisa(SAPS) kuzwelonke uBrigadiya Athlenda Mathe, ugqinile ukuba elinani libanjwe ligqiza likazwelonke lamapolisa eliphanda elityala.

“Ukuzokuthi ga ngoku ngabarhanelwa abangamashumi amabini anesihlanu(25) asele bebanjiwe malunga nelityala,” utshilo okaMathe.

Ukongeza okaMathe ugxininisile ukuba ababarhanelwa babanjwe kumaphondo ohlukeneyo ngale mpelaveki yepasika, abanye babanjwelwe kwiphondo laseRhawutini, eMpuma Koloni, eNtshona Koloni kunye nakwiphondo laKwaZulu-Natal.

Ababarhanelwa bajamelene namatyala awohlukeneyo ubuqhophololo, urhwaphilizo, ukuqweqwedisa, ukubulala kunye nokuzama ukubulala.

Ukubanjwa kwababarhanelwa kunxulumene nophando oluqhubekayo kwiDyunivesithi lokubulawa komanejala wezothutho kuleDyunivesithi, uPetrus Roets kunye noMboneleli Vesele lowo wayengunogada wentsumpa(Vice Chancellor) yeDyunivesithi uNjingalwazi Sakhela Buhlungu.

Ababarhanelwa batsha kulindeleke ukuba baqabele emkhumbini kwiNkundla kaMantyi yaseDimbaza, ngaloLwesibini waleveki.

UMkomishinala wamapolisa kuZwelonke uNjengele Fannie Masemola unqwalile ukuba eligqiza lisezokuqinisekisa likhangela nasezicithini abo bangekafumaneki.

“Eligqiza silichongileyo alilali buhlayo, lizimisele ukubamba oyena ngqondo-ngqondo ophemba umilo wobuqhentseba, urhwaphilizo, kunye nokubulala kuleDyunivesithi,’ Njengelele Masemola.

31 EyoKwindla 2024