AMAGOSA APHEZULU EDYUNIVESITHI ADYOBHEKA KWINGXUBA-KAXAKA
DIMBAZA- Umanejala kunye nepolisa elihezulu babandakanyeka kwisigigaba seDyunivesithi yaseFort Hare.
Ngabantu abalishumi elinesihlanu(15) abajamelene namatyala obuqhetseba kunye norhwaphilizo kwidyunivesithi yaseFort Hare, kubo kuquka umanejala osebenza kwi ofisi yentsumpa(Vice Chancellor) yeDyunivesithi, ipolisa elingumphandi ophezulu kwigunya bantu lezotshutshiso(NPA) kwicandelo lezimali ze-asethi(Asset Forfeiture Unit/AFU).
Ababarhanelwa babanjwe ngempelaveki yepasika, ukanti bebekhe bathi tshe, phambi kwenkundla kaMantyi eDimbaza.
UNozuko’Zuki’ Mabomb ngomnye wabarhanelwa ebebeqabele emkhumbini ngoLwesibini, nongu Manejala kwi ofisi kaVice Chancellor uNjingalwazi Sakhela Buhlungu. Lomba uye wamiselwa uLwesithathu weveki ezayo ukuze kuphulaphulwe isicelo sebheyile.
UTerrance Joubert, nongusomaqhuzu womphandi kwicandelo le-AFU kwiphondo laKwaZulu-Natal ungomnye otyholwa njengo tyumpa-tyumpeka kwesisigigaba setyala lorhwaphilizo.
UMphathiswa wenkonzo yesipolisa uBheki Cele ebeyokuzimamelela elityala enkundleni. Ebekhatshwa nguMkomishinala wenkonzo yesipolisa eMzantsi Afrika uNjengelele Fannie Masemola, obambele umkomishinala wamapolisa ephondweni uNjengelele Zithulele Dladla noBuhlungu ebemphelekile umphathiswa.
Umtyholwa onenkampani okwangu msebenzi kule dyunivesithi aphinde abengumnikezi nkonzo, ujamelene namatyala elobuqhetseba, urhwaphilizo kunye netyala lokuxhamla.
UIsaac Plaatjies owayeyintloko yezokhuseleko kule dyunivesithi naye ukwatyabekwa ityala. Elakhe ityala linxulumene nokubulala kwakunye nokuzama ukubulala amagosa edyunivesithi, utyabekwe elityala kunye nesinye isithoba.
Ukuzokuthi ga ngoku abantu ababanjiweyo ngokwamatyala wabo ohlukeneyo bangamashumi amabini anesihlanu(25), amatyala okunyhasha ulwaphulo-mthetho kunye norhwaphilizo akhokhele ekubeni ukuba kusweleke abaqashwa ababini bedyunivesithi.
Owayengunogada kaBuhlungu uMboneleli Vesele wabulawa ngenyanga yoMqungu 2023 ukanti lowo wayengu manejala kwezothutho kuledyunivesithi uPetrus Roets wadutyulwa ngenyanga kaCanzibe 2022.
UBuhlungu ungqinile ukuba abasebenzi bedyunivesithi ebebethe tshe enkundleni ngoLwesibini bonke basanqunyanyisiwe emsebenzini.
“Bonke abo baphangela kuledyunivesithi ndababonisa kudala umnyango ukuba uphi,” utshilo okaBuhlungu.
04 Tshazimpuzi 2024