Ulwaphulo-mthetho

AMFILIBA AMATHUBA WOKUFUMANEKA KWEENKOMO EZINTLANU

MQANDULI- Zintlanu(5) iinkomo ezikhutshwe esibayeni kumtyanti kaSakhiwe Ngcwangu okwilali yakuMatshamba eMqanduli.

Kubhaqwe iingcungela zeengcaphephe zamasela wemfuyo ezimbini.

Ezinkunyevu zibhaqwe bubuxhaka-xhaka balemihla ngomboniso we’CCTV’ benyantsula betecezisa iintsula, bekhekheleza oku kukanonkala besingise ngasebuhlanti. Omnye kwezinkuntsela zamasela ubezogqume ubuso ngeplastiki emhlophe namhlanje umhla wama-29 Tshazimpuzi 2024, ngelixesha omnye ubenyuse imixhadi ngomtya wentamo ende kufutshane nothango lwalomzi. Ezinkomo bazithathe ngomhla wama-26 Tshazimpuzi 2024.  

Ngelixesha kwenzeka lento ilanga belihlabe umhlaba. Uye wabhaqwa lo mfo ngexesha enyoshoza esiya ngakucingo olubiyele lo mtyanti, wabuzwa ngumntu obengaphakathi emzini lowo ukuba uyaphi, kwaye ufuna ntoni. Uye wabimbitha amazwi ephendula into engavakaliyo oku komntu otsha ngamazambane ashushu.

Baphinde babuya ebusuku kwisithuba sentsimbi yeshumi elinanye, kulapho baye babhaqwa bubuxhaka-xhaka balemihka be’CCTV’. Bazikhuphile iinkomo ezintlanu(5) bahamba nazo.

Ongumhlali wale ndawo UMandlonke Mtshoba uye wacela kutata walomzi ukuba azenzele olwakhe uphando nalapho angcambazelise umfana ongummi waseLesotho.

Ekumngcambazeliseni uye wathi lo mfana iinkomo zikwenye ilali ekuthiwa kuseSikhobeni kwaye usebenzisana nabemi ababini baseLesotho uThabiso noThabang. 

Kuyiwe eSikhobeni kodwa wakhanyela wama ngomlenze omnye esithi ubexoka kuba esoyika ukubethwa.

Amalungu wosapho amabini azamile ukuyovula ityala emapoliseni eMqanduli kodwa awancedakala kuba kusithiwa makuze umnikazi weenkomo ezo ephethe iincwadi kunye nesazisi sakhe.

Umnikazi weenkomo ke ngoku ngokutsho kwabo ukude, bona bebeyovula ityala kuba ingabo abajongene nalamzi. Iinkomo azikafumaneni kunangoku.

Mzukisi Mangwane

29 Tshazimpuzi 2024

ReplyForwardAdd reaction