IPHEPHA NDABA LIPHEHLELELWE NGOKUSESIKWENI
EMONTI- Iphepha ndaba iEC Indaba likhuphe iikopi zamaphephandaba ezingama 10 000 phantse kuzo zonke iivekinkile zakwaSpar kumbindi wesithili saseOR Tambo kule veki iphelileyo, emveni kweminyaka elijelo belipapasha iindaba kumakhasi onxibelelwano.
Eliphepha ndaba liphehlelelwe ngokusesikweni kule veki iphelileyo. Iphepha ndaba iEC Indaba liphepha-ndaba elizingca ngokunkinkisha iindaba zasephondweni, kwaye bazingca ngokutyekeza iindaba ngolwimi lweenkobe.
Eliphepha ndaba nanjengoko sele liphehlelelwe ngokusesikweni ngoku lizokuphuma rhoqo ngeveki lityutyha iphondo laseMpuma Koloni.
Usomashishini olinina nozinze eMonti uAnelisa Zono nguye umsunguli weliphepha ndaba, noyinzalelwane yaseDutywa ukanti unesiqinisekiso seFinancial Management owasifumana ngonyaka ka2012 kwi kholeji yaseFalse Bay eKapa.
Losomashishini ulandele ikhondo lobuntatheli emveni kokuba efunxe ulwazi lobuntatheli kwizikhululo zendaba zasekuhlaleni, nanjengoko wayengunondaba.
“Ndizibophelele ngeqhina lomtshato lokuthanda iindaba ngexesha ndandixhuzul’imkhala kwisikhululo sikanomathotholo sasekuhlaleni iNkqubela FM ngonyaka ka2018, ndandula emveni konyaka ndaphangela eNgqushwa FM,” utshilo okaZono.
UZono ibiliphupha lakhe esakhula ukuba kwicandelo lezendaba lade iphupha lakhe lafezekiseka ngonyaka ka2018, “Nanjengoko amahla ndenyuka esoloko ekhona ndazixelela ukuba ukuncama kona soze ndincame ndizokulileqa iphupha lam lide lifeziseke,” Zono.
Ukongeza uZono ngusomashishini onemibono ingakumbi kwicandelo lezoshishino ukwanguye nomnye womseki wembasa iEastern Cape Hustlers Awards isiseko esiqinisekisa ukuba abo baphandayo ephondweni bayakwazi ukubeka isonka etafileni.
UZono ukwatyatyadule, “Ndikwakwanguye nomnye umlawuli wesiseko iPhanda Mzansi, lombutho ugxile ekuncediseni amashishini asakhasayo ekuwabekeni kunqwanqwa oluphezulu, ndikwalilo nelungu lebhodi kumbutho iSisonke Gender Justice,” uthethe watsho.
UZono uyazindla ukuba iphepha lakhe ngoku liyakwazi ukufumaneka ezivenkileni kwaye aliphelelanga kumakhasi wezonxibelelwano.
Somila Tiwani
03 Canzibe 2024
