IDYUNIVESITHI YASE WSU IZIBOPHELELE EKUSEBENZISENI NESEBE LEZEMPILO
BHISHO- Iziko lezonyango kunye nenkonzo zezempilo kwidyunivesithi yaseWalter Sisulu(WSU) lityikitye isivumelwano sokusebenzisana nesebe lezeMpilo eMpuma Koloni, oku kuza emveni kokuba ledyunivesithi iqweba amaqhinga okuzisa iinkonzo zempilo ezisemgangathweni kwizibhedlele zengingqi zephondo.
Idini yezonyango kunye neenkonzo zempilo kwidyunivesithi yaseWSU uNjingalwazi Wezile Chitha, ugxininisile ukuba bazimisele ukwenyusa izinga lezempilo ephondweni ingakumbi emaphandleni.
Nanjengoko elicandelo lezonyango lizakube libhoyezela iminyaka engamashumi amane(40) ngonyaka ka-2025 lizimisele ukuthi gqolo, lizama ngako konke okusemandleni liqweba amaqhinga okuphucula izinga lezempilo ephondweni.
Ukongeza uNjingalwazi Citha ungqinile ukuba, “Sisebenzisana nebhunga lorhulumento wezifundo sizokuzama ngako konke okusemandleni sisebenzisana nezibhedlele zengingqi, sizame ukwenza uqeqesho olufanelekileyo ezibhedlele,”utshilo.
UNjingalwazi unqwalile ukuba zikhona izibhedlele ebebekhe bazindwendwela; iSt Elizabeth, iFrontier kunye naseCecelia Makiwane nalapho bebeyokuphonononga ukuba ingaba isebe likulungelele kangakanani ukuzibophelela kweliqhina lokubambisana.
IDyunivesithi yaseWSU itshotsh’entla kwizifundo zonyango kwihlabathi jikelele, kwaye yothulelwe umnqwazi ngumbutho wezempilo kwihlabathi jikelele(WHO) nanjengoko iyiDyunivesithi yesibhozo etshotsh’entla kwimiceli-mngeni yezempilo ekuhlaleni.
13 EyeSilimela 2024