KUBEYINYHIKITYHA YOKUFA KUMHLABA WASEMAMPONDWENI IZOLO
MBIZANA- Bathandathu(6) abahambi ngenyawo abathe baphulukana nobomi izolo umhla wama-21 kweyeSilimela 2024 kwindlela uR61 okwindawo yaseRedoubt kufutshane naseMzamba xa usingise ePort Edward.
Le ngozi ibangelwe yinqwelo-mafutha encinci kwisithuba sentsimbi yeshumi elinanye(23H00)kubusuku bayizolo.
Inqwelo-mafutha eluhlobo lweBMW Sedan belisuka kwicala laseMbizana kukho indoda enye kulo isiya kwicala lasePort Edward, kwabe endleleni kukho amadoda amathandathu(6) ezihambela into yawo kude kufuphi nendlela.
Le nqwelo iye yangqala ngqo kwesisithandathu(6) yantlaleka kuso kwabhubha amadoda amahlanu(5) kwindawo yexhwayelo, indoda enye(1) yabhubhela endleleni eya esibhedlele eAdelaide Tambo kwalapho eMbizana.
Okwangoku unobangela walengozi ubungekaziwa ukuzothi ga ngoku. Amapolisa wona asezithendeni zomqhubi nanjengoko esagcwele amathafa eshiya lo mnyobo nalomnyonyovu wesinyavu-nyavu sakwaBWM kwindawo yexhwayelo.
Ingxelo ithi, le ndoda yehlike nje kule nqwelo yayo yababeleka abasicatyana iphithizeliza ezongcondwana nezongcaba ishiya inqwaba yabantwana babantu bethe tywa kwichibi legazi.
Inqwelo yakhe iye yathathwa ngabakwantsasana. Ityala lokubulala ngokungenanjongo livuliwe ukuze kuqhutywe uphando oluthe vetshe.
Mzukisi Mangwane
22 EyeSilimela 2024