Ezasekuhlaleni

UTHIWE NKAMFU NGESIXHANTI WAPHOSWA KWEZIMNYAMA OTYHOLWA NGOKUBULALA

MBIZANA- Ubanjwe esaphithizelisa iingcaba emathafeni umfana oneminyaka engamashumi amabini anesiXhenxe(27) ubudala.

Ngomhla wama-21 kweyeSilimela kulo umiyo kwindlela uR61 ozinze kwindawo yaseRedoubt cebukuhle naseMzamba kwindlela esingise ePort Edward, kwenzeka isithwakumbe neshwangusha nesishiqi esingaqhelekanga.

Ngalomhla ukhankanywe ngasentla kwantlithwa amadoda amathandathu(6) lahlanza iselwa, entlithwa yinqwelo-mafutha eluhlobo lweBMW Sedan kwisithuba sentsimbi yeshumi elinanye(23h00) ebusuku.

Osisithethi seSebe lezoThutho ephondweni leMpuma Koloni u-Unathi Binqose wayizoba le ngozi njengeyona ingaqhelekanga sukela wasebenzela elaSebe.

OnguMphathiswa kwiSebe lezoThutho ephondweni leMpuma Koloni uXolile Nqatha wagqithisa amazwi wovelwano kwiintsapho ezichaphazelekileyo ecenga kananjalo kubahambi ngeenyawo baqaphele ngalo lonke ixesha besendleleni.

Amapolisa zange alale, oko esezithendeni zalomfana.

Le dyongwana iseluvalelweni kwaye ibekwa izityholo zokubulala ngokungenanjongo, izakuvela kwinkundla kaMantyi malunga nezityholo ezo zokubulala ngokungenanjongo.

Bakhona abasabhila-bhilwa ngoogqirha kwisibhedlele saseAdeliade naseO R Tambo.

Mzukisi Mangwane

23 EyeSilimela 2024