UYITSHISE YALUTHUTHU IMVEKU
NGQUSHWA- Kwisiganeko esibuhlungu nesiphazamisayo esenzekileyo eNgqushwa kwilali yase Crossroads, inkwenkwana eneminyaka emibini ubudala ibethwe yaza yatshiswa ngumama wayo oneminyaka engama-41 ubudala ngobusuku bangoMvulo.
Izityholo zithi unina kudala eqweba amaqhinga okutshisa unyana wakhe nanjengoko iingxelo zidiza ukuba uye wacela imatshisi neparafini kunyana wakhe oneminyaka esixhenxe, phambi kokuba atshise lemveku.
Umbutho iKhula projekthi EC uvakalise umothuko nosizi ngesi sehlo, umemelela ukuba kupheliswe ubundlobongela obunjongiswe ebantwaneni.
Ilungu lombutho iKhula project EC uPetros Majola uthethe wenjenje, “Kukho izibonelelo ngaphakathi kwisebe lophuhliso loluntu ukulungiselela amatyala anje ngokugwintwa nokubulawa kwale miphefumlo ingenatyala.”
Abazali bayabongozwa ukuba bafune uncedo kwii-ofisi zophuhliso lwentlalo ukuba baziva besonganyelwa kukukhathalela abantwana.
Zintle Elam Tsita
10 EyeKhala 2024
