ILIWA LIBHEKE UMOYA KWABATYHOLWA NGOBUQHETSEBA
MONTI- Abatyholwa ngobusela kuthiwa abayidyakrazanga imali yabarhafi bayosulele entloko nasemnqwazini, ingxelo ithi ngamasela, amatutu amamencukazi, amabhedengu namaqotha-qikili wodwa kuMasipala ombaxa waseBuffalo City, eMonti.Ingxelo zimbini ziyothusa kwaye zidiza into enye.
Eyokuqala ikhutshwe ngumKomishinala wamapolisa kwiphondo leMpuma Koloni uLt-Gen Nomthetheleli Mene, lo kaMene ukhuphe ingxelo kunyaka ophelileyo kweyeDwarha, le ngxelo iqulathe izityholo zokudyakrazwa kwemali engange R13 Million yabarhafi kuMasipala ombaxa waseBuffalo City.
Eyesibini ingxelo ikhutshwe lilungu lombutho weDemocratic Alliance(DA)eBuffalo City uAyanda Majeke, yena lo kaMajeke wabhalela umkhuseli woluntu(Public Protector), ediza kanye obubututu sebudizwe ngumKomishinala wamapolisa.
Le ngxelo ithi uMasipala wesixeko saseMonti iBuffalo City Metropolitan Municipality(BCMM) uchithe izigidi ezilishumi elinesithathu zeerandi(R13 Million) kubhatalwa onogada babucala kooCeba abangadingi lukhuseleko.
Abaceba kuquka kubo uMMC uSiwe Ntsasela, Siwe lowo wade wanikwa onogada abane(4) akwaphelela nje apho wathiwa gaxa ngeqegu likanokutsho elikwizinga lokukhwelisa uSodolophu nosekela Sodolophu. Amanye amaxhwitha-ntamo wooCeba abathe baxhamla kwelithamsanqa lokuwelwa ngumqa esandleni kwimali yeempula zikalujaca ngaba;
1. nguKosani, 2. Gxarishe, 3. Clara4. Yekiso,5. Ciliza,6. Goci Kunye noManejala wesixeko uMxolisi Yawa nongasekhoyo uNceba Ncunyana kunye noL Mnxulwa.
UNceba Ncunyana kunye noMnxulwa bona ngokwezingxelo zombini kwakunyanzelekile ukuba baxhamle ekubeni bagadwe nanjengoko kwakukho izigrogriso zokubulawa.
Ongasekhoyo uNcunyana ude wayakulala ngophotho eshiya eli limagad’ ahlabayo engekabanikwa onogada bokumkhusela ngoku sele isaziwa imeko yakhe. Amanye amasela la ebezitabhatela nje kwimali yabarhafi kungekho nesinjani isidingo sokhuseleko nanjengoko bekungekho zigrogriso ngakubo.
Ongasekhoyo uMhlekazi uNcunyana ulivule kathathu(3) ityala engancedakali, amarhamncwa anukelwa ligazi ade elifumana ithuba lokumgqithisa amafu. Okokuqala uvule ityala kwinyanga kaTshazimpuzi 2022, wavula elinye kweyeKhala 2022, wagqibezela ngokuvula elinye kweyeThupha 2022, kodwa akukho nolunye uncedo awalufumanayo.
UMajeke uthi kudala bebhalela uMasipala befuna iimpendulo kodwa wonke lo malinge wemigudu namatile-tile awela phantsi. “Ndimbhalele uSomlomo, uManejala wesixeko, UMphathiswa wakwaCOGTA, uMpathiswa weSebe lezoKhuseleko lwabantu, kodwa ndabhalela nje abantu abaneendlebe ezibuthuntu kungenjalo bachophe ngazo”, utshilo.
Kude kwabe kuyashicilelwa zingekafumaneki iimpendulo nkqu nakuSomlomo webhunga leBCM uCllr Humphrey Maxhegwana.
24 EyeDwarha 2024
